Nhi jaanti mujhay tum say yeh kesi muhabbat hai

Kuch khawaab meri aankhon nay palkon say yuun baandh rakhay hain

Palkon ki mundair'on pay ashkon nay jesay thaam rakhay hain

Dekhti hoon tum yaheen ho paas meray

Be'khudi kay saaray mausom sabz baarishon men bheegay meray paas parray hain

Tumhari roshan aankhen muhabbat kay noor say aur jalti jaati hain

Tum apni dhun men jaanay kaya kaya kahay jaatay ho

Saat samandar apni he dhun men bahay jaatay ho

Wohi shab o roz ki tafseel wohi waqt aur kaam ki taaweel

Aur phir meri yaad ki tamseel

Mein hans parrti hoon aur saaray manzar bad'al jaatay hain

Yuun lagta hai tum nhi wahaan koi aur pal hotay hain

Udaas na'muraad si raat aangan men utar aati hai

Her taraf tumhari khushbu si sarsarati hai

Mein khawaab men he apnay weham say bhaagnay lagti hoon

Be'qaraari say tumhen yahaan wahaan dhoondnay lagti hoon

Shukar khawaab tha keh kar khud ko behlaanay lagti hoon

Phir

Waqt kay maathay par umeed e visaal ka aik pal thehar jaata hai

Dasht e khawaab men lamha jesay pyaas ka thehar jaata hai

Shaakh e hijr phir kaanpnay lagti hai

Na'umeedi kaantay honay lagti hai

Neendon men aaj tumhara kaheen nishaan na tha

Daak men bhi tumhara kaheen ata pata na tha

Kaash yeh khawaab men he hua ho

Aur mujhay ab aankhen kholna ho

Phir saaray manzaron nay badal'na ho

Manzar bad'al gaye jaanaan

Mein nay yeh kaya suna keh meri aankhen hairat kada hain

Sun kay aawaaz tumhari meri samaat'en maatam kada hain

Is bars bhi tum na aa sako gay

Acha. . koi baat nhi. . . kehtay huye meri aawaaz dhundla jaati hai

Aglay bars to aa sako gay. . kehtay huye meri umeed sabz ho jaati hai

Shaayad. . . dekho. . suntay he intezaar ki aik fasal ugnay lagti hai

Meray pallu say bandhay sab khawaab girnay lagtay hain

Palkon ki mundair'on pay rakhay ashk tootnay lagtay hain

Nhi jaanti mujhay tum say yeh kesi muhabbat hai

Is rishtay ka naam kaya hai?

Isay kab tak nibaah sakuun gi

Tumhen kab tak chaah sakuun gi

To Kaya Tum Itni Be'Hiss Ho?

Meray Teemaar'Daaron Say
Maseeha Jab Yeh Keh Dain gay
Dawaa Taaseer Kho Bethi
Dua Ka Waqt Aa Pohancha

Yeh Beemaari Bahana Thi
Qaza Ka Waqt Aa Pohancha

To Kaya Tum Itni Be'Hiss Ho?

Yaqeen Iss Par Na Laao Gi

To Kaya Tum Itni Zaalim Ho
Mujhay Milnay Na Aao Gi ?

paanch'waan mausom

Mein us ka paanch'waan mausom

Usay tab yaad aauun ga

Keh jab kuch bhi nhi ho ga

Na koi rang ka mausom

Na rasm e sang ka mausom

Rahay ga yaad ka mausom

Dil e barbaad ka mausom

Usay tab yaad aauun ga

Bohat he yaad aaun ga !

aaj bohat din baad suni hai BARISH ki aawaaz

aaj bohat din baad suni hai BARISH ki aawaaz
aaj bohat din baad kisi manzar nay rasta roka hai
rim jhim ka malboos pehan kar yaad kisi ki aayee hai
aaj bohat din baad achanak aankh yuun'hi bhar aayee hai
Aankh aur manzir ki wus'at men chaaron jaanib barish hai
Aur barish men, duur kahin ik ghar hai jis ki
Ek ek eent pay teray meray khwab likhey hain
Aur us ghar ko jaanay wali kuch galiyan hain
Jin men hum dono kay saaye tanha tanha bheeg rahay hain
Darwazay par qufl para hai aur dareechay soonay hain
Deewaron par jami hui kaaii men chup kar
Mausam hum ko dekh rahay hain
Kitnay baadal, hum dono ki aankh say ojhal
Baras baras kar guzar chukay hain...

Ek kami si,
Ek nami si,
Chaaron jaanib phail rahi hai,
Kaii zamanay ek hi pal men
Baham mil kar bheeg rahay hain
Andar yaaden sookh rahi hain
Baahir manzar bheeg rahay hain!!!

"Mujhay Us Say Muhabbat Hai"

Woh Mujh Say Yeh Nahin Kehti
Usay Mujh Say Muhabbat Hai

Magar woh Aaj Kal Aik Janoon ki Zad Men Rehti Hai
Ajab Aik Be'khudi Hai
jo Usay Be'chain Rakhti Hai
Woh Mujh Say Baat Karti Hai....
Bohat Hi Aam Si, Mausom Ki, Logon Ki
Mehaz Duniya Ki Rasmo�n Ki

Woh Mujh Say Baat Karnay Kay Bahanay Dhoondti Hai In Hawalon Say
Samajhti Hai Mein Us Ki Aam Si Baaton Ko
Bass "Yuun hi" Samjhta Hoon
Woh Milti Hai Mujhay Aksar Bahanon Say
Keh Mein Guzri Yahaan Say, Socha Baat Hi Kar Loon
Samajhti Hai Mein Us Kay In Bahanon Ko Na Janoon Ga

Kabhi Jo Phone Karti Hai
To Uski Mohabbat Us Kay Lehjay Say Jhalakti Hai
Mujhay Be'chain Karti Hai
Woh Mera Dhayaan Rakhti Hai

Meri Her Baat Ko Bin_Kahay Hi Woh Jaan Leti Hai
Samajhti Hai Woh Yeh Phir Bhi....!!!
Us Nay Khud Ko Chupa Rakha Hai Khud Hi Say

Magar Aksar...!!!
Woh Khud An'janay Men Apna Yeh Parda Chaak Karti Hai
Keh Jab Meri Bohat Pehlay Kahi Huii
Her Baat Ko Woh Yaad Rakhti Hai
Aur Unhi Lafzon Ko Meray Saamnay Duhra Bhi Deti Hai
Yuun Lagta Hai Keh...!!!
Us Nay Meri Kahi Her Baat Ko Yaad Rakha Hai
Woh Mujh Say Yeh Nahin Kehti
Keh Us Ki Khawahish Usko Bohat Be'chain Rakhti Hai
Ya Shayad In Dinon Woh Khud Say Bhi Chupati Hai

Magar...!!!
Uski Nigahain Aksar Usay Nakaam Kartin Hain
Keh Saaray Jaam Ulfat Kay Woh Bhar Bhar Kar Lutati Hain
Woh Darti Hai Keh Kahin Kho Na Day Mujh Ko
Keh Koi Baat Uski Mujh Ko Us Say Door Na Kar Day
Woh Mujh Ko Sochti Hai
Jaagti Hai Raat Bhar Woh Bhi

Magar Shayad Abhi Usko Muhabbat Men
Khamoshi Say Hi Jalna Hai
Keh Woh Jab Tak Parh Nahin Leti
Yeh Aankhin Jis Men Keh Uska Naam Likha Hai

Keh Meray Lahoo Ki Gardishon Men Raqs Karti Chaahatain Uski
Woh Jab Tak Paa Nahin Leti
Samajh Nahin Leti, Jab Tak...!!!
Keh Mein Bhi Gaam'zan Hoon
Khamoshi Say Us Kay Rastay Par

Mein Bhi Jaagta Hoon...Sochta Hoon Raat Bhar Us Ko
Magar Us say Nahin Kehta...!!!

"Mujhay Us Say Muhabbat Hai"

Tujhay Khonay Ka Gham Kyun Hai

Jab Joban Tera Dhal Jaaye

Jab Joban Tera Dhal Jaaye

Jab Pyar Ki Umar Niakl Jaaye

Jab Chhor Day Tujh Ko Husn Tera

Jab Chehra Pur Ho Jhuriyon Say

Jab Zulf Kay Khamm Na Baqi Hon

Jab Rangat Na ho Gaalon Men

Jab Chandni Utaray Baalon Men

Jab Aankh Ki Masti Toot Chukay

Jab Hont Bhi Surkhi Kho Jaayen

Jab chhor Dain Tujh Ko Sab Saathi

Jab Koi Na Tujh Ko Apnaaye

Tab.!

Meray Paas Chali Aana

"Basti" Ki Sooni Galiyon Men

Ek Betha Ho Ga Deewana

Jo Pyar Ka Paaras Pathar Hai

Jo Tujh Ko Sona Kar Day ga.!

Teray Joban Ko Woh Kaya Jaanay?

Teri Umar Say Us Ko Kaya Matlab?

Teray Jism Say Us Ka Kaya Rishta?

Jisay Kehtay Ho Tum Harjaayii

Hai Teray Naam Ka wo Shedaayii..